யூரோ கிண்ணக் கால்பந்தாட்டம்; போலந்தை வீழ்த்தியது ஜேர்மனி

கிளகென்பர்ட், ஜூன் 09
லுகாஸ் பொடொல்ஸ்கி இரண்டு கோல்களை அடித்துக்கொடுக்க, யூரோ கிண்ணக் கால்பந்தாட்டத் தொடரில் இலங்கை நேரப்படி இன்று அதிகாலை நடந்த லீக் ஆட்டமொன்றில் 20 என்ற கோல் கணக்கில் போலந்தை ஜேர்மனி வெற்றிகொண்டது.
2008ஆம் ஆண்டுக்கான ஐரோப்பிய அணிகள் மோதும் யூரோ கிண்ணத்துக்கான கால்பந்தாட்டத் தொடரை சுவிற்ஸர்லாந்து, ஆஸ்திரியா ஆகிய நாடுகள் இணைந்து நடத்துகின்றன. இத்தொடரில் 4 பிரிவுகளில் மொத்தம் 16 அணிகள் உள்ளடக்கப்பட்டுள்ளன.
நேற்று ஆஸ்திரியாவில் இரண்டு லீக் ஆட்டங்கள் நடைபெற்றன. முதல் ஆட்டத்தில் சொந்த மண்ணில் குரோஷியாவை எதிர்கொண்டது ஆஸ்திரியா. இந்த ஆட்டத்தின் ஆரம்பத்திலேயே குரோஷியாவுக்கு கோல் அடிக்கும் வாய்ப்பு அமைந்தது. 4ஆவது நிமிடத்தில் பெனால்டி வாய்ப்பு மூலம் கிடைத்த அந்த வாய்ப்பைச் சரியாகப் பயன்படுத்திக்கொண்ட குரோஷிய வீரர் லுகாமோட்ரிக், அற்புதமாகக் கோலைப் பெற்றுக்கொடுத்து அணியை முன்னிலைப்படுத்தினார்.
பதிலடிகொடுக்க ஆஸ்திரியா கடுமையாகப் போராடியது. உள்ளூர் ரசிகர்களின் ஆதரவு இருந்தும் ஆஸ்திரியாவால் பதில் கோலை கடைசிவரை அடிக்க முடியாமல் போனது. இறுதியில் குரோஷியா 10 என்ற கணக்கில் வெற்றியைச் சுவீகரித்தது.
ஆஸ்திரியாவின் கிளகென்பர்ட்டில் நடைபெற்ற இரண்டாவது லீக் போட்டியில்”பி’ பிரிவில் இடம்பெற்றிருந்த ஜேர்மனியும், போலந்தும் பலப்பரீட்சையில் ஈடுபட்டன. ஆரம்பத்திலிருந்தே ஜேர்மனி வீரர்களின் ஆட்டம் மிகவும் அபாரமாக இருந்தது. அவர்களது தாக்குதல் ஆட்டத்துக்கு முன்பு போலந்து வீரர்கள் நிலைகுலைந்து போயினர்.
ஆட்டத்தின் 20ஆவது நிமிடத்தில் ஜேர்மனி முதல் கோலை அடித்தது. மிரோஸல்வ் குளுஸ் அடித்த பந்தை லுகாஸ் பொடொல்ஸ்கி கோலாக்கினார். முதல்பாதி ஆட்டத்தில் ஜேர்மனி 10 என்ற கோல் கணக்கில் முன்னிலையிலிருந்தது.
73ஆவது நிமிடத்தில் ஜேர்மனி இரண்டாவது கோலை அடித்தது. பொடொல்ஸ்கியே இந்தக் கோலையும் அடித்தார். இறுதிவரை போலந்து வீரர்களால் பதில் கோலை அடிக்க முடியவில்லை. முடிவில் ஜேர்மனி 20 என்ற கோல் கணக்கில் வெற்றியை ருசித்தது.
யூரோ கிண்ணக் கால்பந்தாட்டத் தொடரில் 1996ஆம் ஆண்டுக்குப் பின்னர் ஜேர்மனிக்குக் கிடைக்கும் முதல் வெற்றி இதுவாகும். அதுவும் மூன்று தடவைகள் ஜேர்மனி யூரோ கிண்ணக் கால்பந்தாட்டத் தொடரில் சம்பியனாகியுள்ளமை குறிப்பிடத்தக்கது.ஜேர்மனி அணிக்காக இரண்டு கோல்களையும் அடித்த பொடொல்ஸ்கி, போலந்து நாட்டில் பிறந்தவர். பின்னர் ஜேர்மனியில் குடியுரிமை பெற்றிருந்தார்.
ஜேர்மனி அடுத்த ஆட்டத்தில் குரோஷியாவை 12ஆம் திகதி எதிர்கொள்கின்றது. அதேநாளில் போலந்து, ஆஸ்திரியாவைச் சந்திக்கின்றது.